Nasamsam ang tinatayang Php879,400 halaga ng hinihinalang shabu sa isinagawang operasyon ng mga awtoridad sa Barangay Mampang, Zamboanga City nito lamang ika-15 ng Hunyo 2024.
Kinilala ni Police Brigadier General Bowenn Joey Masauding, Regional Director ng Police Regional Office 9, ang mga suspek na sina alyas “Rizal”, 41, residente ng Barangay Kasanyagan, Zamboanga City at alyas “Boy”, 40, na residente ng Sitio Asinan, Barangay Mampang, Zamboanga City.
Bandang 8:35 ng gabi nang ikasa ang buy-bust operation ng mga operatiba ng City Drug Enforcement Unit 9 sa pangunguna ni Police Captain Royland C Cordero katuwang ang City Intelligence Unit, 904th Maneuver Company – Regional Mobile Force Battalion at 1st Zamboanga City Mobile Force Company na nagresulta sa pagkakaaresto ng dalawa at pagkakapatay ng isa pang suspek.
Nakumpiska mula sa mga suspek ang tatlong piraso ng heat-sealed transparent plastic sachet na may timbang na 128 gramo na tinatayang nagkakahalaga ng Php879,400, isang caliber 45 pistol at isang Php1,000 bill na ginamit bilang buy-bust money.
Samantala, mahaharap ang mga suspek sa kasong paglabag sa Section 5, Article 2 ng Republic Act 9165 o “Comprehensive Dangerous Drugs Act of 2002”.
Patunay lamang na ang Pambansang Pulisya ng Pilipinas katuwang ang ibang ahensya ng pamahalaan ay hindi nagpapabaya sa kanilang sinumpaang tungkulin na hulihin ang mga taong tiwalag sa batas, mapanatiling ligtas ang komunidad, at ipatupad ang kapayapaan ng bansa para sa mas maunlad na Bagong Pilipinas.
Panulat ni Patrolwoman Louise Marie V Conde
