Nasamsam ng mga tauhan ng Bulacan PNP ang mahigit Php870,444 halaga ng hinihinalang shabu mula sa dalawang High Value Individual sa isinagawang buy-bust operation sa Barangay Pulong Buhangin, Santa Maria, Bulacan nito lamang Huwebes, ika-27 ng Pebrero 2025.
Kinilala ni Police Lieutenant Colonel Voltaire C Rivera, Chief of Police ng Sta Maria Municipal Police Station, ang mga suspek na sina alyas “Mang Jess”, 59 anyos, at alyas “Bunso”, 27 anyos, kapwa residente ng nasabing lugar.
Matagumpay ang operasyon sa pinagsanib na pwersa ng Bulacan PIU, PDEA Bulacan at Special Drug Enforcement Unit (SDEU) ng Sta Maria Municipal Police Station.
Nasamsam mula sa mga suspek ang 128 gramo ng hinihinalang shabu na may Standard Drug Price na Php870,444 at iba pang non-drug items.
Ang mga suspek ay mahaharap sa kasong paglabag sa Section 5 at Section 11 ng Republic Act 9165 o ang “Comprehensive Dangerous Drugs Act of 2002”.
Patuloy na pinaiigting ng Pambansang Pulisya ang kanilang kampanya laban sa ilegal na droga upang matiyak ang kaligtasan at seguridad ng mamamayan, tungo sa isang mas ligtas at drug-free na lipunan.
Panulat ni Pat Mildred A Tawagon
