Novaliches, Quezon City — Tinatayang nasa Php840,000 halaga ng marijuana ang nakumpiska sa dalawang drug suspect sa buy-bust operation ng Novaliches Police Station – 14 sa Quezon City nito lamang Lunes, Oktubre 3, 2022.
Kinilala ni Quezon City Police District (QCPD) Director, PBGen Nicolas D Torre III, ang mga suspek na sina Salvador Belesario alyas “Boss”, 18, at Amador Grefal, alyas “Nonoy”, 21, na kapwa residente ng Brgy. Commonwealth, Quezon City.
Ayon kay PBGen Torre Ill, dakong 2:30 ng madaling araw nang maaresto sina Belesario at Grefal sa No. 1015 Salvador Ave., Jordan Plains Subd., Brgy. Ang Sta. Monica, Novaliches, Quezon City ng mga operatiba ng Station Drug Enforcement Unit (SDEU) ng Novaliches PS-4.
Ayon pa kay PBGen Torre lll, isang police na poseur buyer ang bumili sa mga suspek ng Php21,000 halaga ng umano’y marijuana na siyang nagbigay hudyat upang sila’y arestuhin ng mga operatiba.
Dito na nakuha mula sa mga suspek ang humigit kumulang 7,000 gramo ng marijuana na nagkakahalaga ng Php840,000, isang itim na bag, isang itim na duffle bag, at buy-bust money. Kakasuhan ang mga suspek ng kasong paglabag sa R.A. 9165 o ang Comprehensive Dangerous Drugs Act of 2002.
“Sa pamamagitan ng walang humpay na operasyon tulad nito, palagi kaming magsusumikap para pangalagaan ang integridad ng Quezon City at isasaalang-alang ang kapakanan ng mga mamamayan mula sa masasamang epekto ng ilegal na droga,” ani PBGen Torre III.
Gayundin, sinabi ni PBGen Jonnel C Estomo, Regional Director ng National Capital Region Police Office, “Pinapupuri ko ang mga operatiba na nagsagawa ng anti-illegal drug operations na humantong sa pag-aresto sa mga suspek at pagkumpiska ng malaking halaga ng marijuana.
Ang operasyong ito ay malaki ang maitutulong upang mapigilan ang paglaganap ng droga sa ating area of responsibility at sa pangkalahatan, ay makakatulong sa ating patuloy na kampanya laban sa ilegal na droga sa Metro Manila.”
Source: Pio Qcpd
Panulat ni PSSg Remelin M Gargantos
