Nasabat ng mga awtoridad ang tinatayang Php816 milyong halaga ng hinihinalang shabu mula sa isang indibidwal sa Calapan Port, Oriental Mindoro nito lamang ika-21 ng Marso 2025.
Ang joint operation ay pinangunahan ng PDEA 4B, sa pakikipagtulungan ng PNP-SOU 4B, PNP Drug Enforcement Group, PRO MIMAROPA Regional Police Drug Enforcement Unit, Regional Maritime Unit 4B, Calapan City Police Station, Philippine Coast Guard, at Philippine Ports Authority, na nagresulta sa pagkakaaresto sa isang 43-anyos na lalaki mula sa Iloilo City.
Batay sa inisyal na imbestigasyon, galing Batangas Port ang isang sasakyan na patungo sanang Iloilo City nang maharang sa checkpoint palabas ng Calapan Port. Sinubukan pang tumakas ng driver ngunit agad din itong nadakip ng mga awtoridad. Napag-alamang mula rin sa Iloilo ang driver at bumiyahe lamang patungong Batangas upang kunin ang sasakyan. Ayon pa sa suspek, inutusan lamang siya upang ihatid ang sasakyan pabalik sa Iloilo. Natagpuan ang hinihinalang shabu na nakalagay sa mga maleta at bag.
Narekober ng mga awtoridad ang 120 silyadong pakete na naglalaman ng puting crystalline substance na hinihinalang shabu, bawat isa ay tumitimbang ng humigit-kumulang isang (1) kilo, na nakatago sa loob ng dalawang (2) luggage bag at limang (5) handheld bag.
Maliban pa dto, kinumpiska rin ang isang puting Toyota Camry, isang Android phone, at isang tiket sa Montenegro Shipping Lines, na magsisilbing ebidensya sa kaso.
Ang matagumpay na operasyong ito ay isang patunay sa pagiging epektibo ng pinaigting na inter-agency collaboration. Matagal nang itinaguyod ang isang pinag-isang diskarte sa mga ahensyang nagpapatupad ng batas sa paglaban sa iligal na droga, partikular sa pagpapalakas ng seguridad sa pantalan—isa sa mga pinakakritikal na larangan sa pagpigil sa pagpuslit ng droga sa probinsya.
Source: PRO MIMAROPA PNP
Panulat ni Patrolwoman Ana Rose D Guadana
