Nasabat ang Php800,000 halaga ng smuggled na sigarilyo ng Lanao del Norte PNP katuwang ang Kapatagan Municipal Police Station sa Purok 1, Bansarvil 1, Kapatagan, Lanao del Norte na naganap nito lamang ika-6 ng Abril 2025.
Ayon sa ulat, bandang 6:00 ng umaga nang magsagawa ng checkpoint ang mga awtoridad at nagkaroon ng random na inspeksyon.
Dito natuklasan ng mga awtoridad ang mga kahong-kahong reams ng sigarilyo sa backseat ng Mitsubishi Versa van na may plakang WDW 677.
Kinilala ni Police Colonel Roy A Magsalay, Provincial Director ng Lanao del Norte Police Provincial Office, ang mga suspek na sina alyas “Alna”, 23 anyos, at residente ng Sta. Catalina, Zamboanga City; alyas “Al”, 31 anyos, lalaki at residente ng Sta. Catalina, Zamboanga City; at si alyas “Arpi”, 28 anyos, lalaki at residente ng Kasanyangan, Zamboanga City.
Nasabat mula sa mga suspek ang 1,000 reams ng sigarilyo na tinatayang nagkakahalaga ng Php800,000.
Ang mas pinaigting at mahusay na operasyon ay naglalarawan sa pagkakaisa ng ahensya ng pamahalaan para sa kapakanan ng mamamayan at kaligtasan ng komunidad tungo sa maunlad na Bagong Pilipinas.
