Kalinga – Tinatayang Php8,720,000 halaga ng marijuana ang nadiskubre at sinira sa isinagawang marijuana eradication ng pinagsamang operatiba ng mga otoridad sa Brgy. Butbut at Lokong, Tinglayan, Kalinga nito lamang ika-3 ng Oktubre 2023.
Ayon kay Police Colonel Freddie Lazona, Officer-In-Charge ng Kalinga Police Provincial Office, ang operasyon ay sa ilalim ng “Oplan Finnachang” kung saan isinagawa ito ng mga pinagsamang operatiba ng Kalinga PNP, Philippine Drug Enforcement Agency- Kalinga, National Bureau of Investigation, Philippine Army, at MIG 41.
Ang operasyon ay nagresulta sa pagkadiskubre at pagwasak ng walong magkakahiwalay na plantasyon ng marijuana na may kabuuang lawak na 6,250 square meters at may kabuuang tanim na 46,500 fully grown marijuana na nagkakahalaga ng tinatayang Php8,720,000 Standard Drug Price.
Lahat ng nadiskubreng halaman ng marijuana ay agad na binunot at sinunog ng mga operatiba sa mismong lugar.
Bagama’t walang nahuling cultivator ay sinisiguro ni PCol Lazona na magsasagawa ng malalim na imbestigasyon upang matukoy at mapanagot sa batas ang mga nagtatanim ng ipinagbabawal na halaman. Nananawagan kami sa mga residenteng sangkot sa ilegal na pagtatanim ng marijuana na itigil ito at tangkilikin ang mga iniaalok ng LGU partikular na sa livelihood project”, ani ni PCol Lazona.
