Naga City – Tinatayang nasa Php8,160,000 na halaga ng ilegal na droga ang nakumpiska sa isang lalaki na kabilang sa High Value Individual sa ikinasang buy-bust operation ng PNP at PDEA sa Zone 2, LCC Exit Terminal, Barangay Sabang, Naga City nitong Mayo 19, 2023.
Kinilala ni PBGen Westrimundo Obinque, Regional Director ng PRO5, ang suspek na si John Joseph C. Yukim, 36 at residente ng Looban 6, Zone 4, Bayawas, Barangay Abelle, Naga City.
Ayon kay PBGen Obinque, bandang 7:05 ng umaga ng isinagawa ang operasyon ng pinagsanib na mga operatiba ng ODRDO-RPDEU5 Team Naga/ Camarines Sur, Naga City Drug Enforcement Unit at Naga City Police Station 1 sa pakikipag-ugnayan sa PDEA-Camarines Sur Provincial Office.
Ang nasabing suspek ay nabilhan ng isang pakete ng hinihinalang shabu na tumitimbang ng 200 na gramo.
Sa isinagawang body search ay nakuha pa dito ang isang kilo ng pinaniniwalaang shabu.
Sa kabuuan, nasa Php8,160,000 halaga ng droga ang narekober sa suspek.
Ang suspek ay nahaharap sa kasong paglabag sa RA 9165 o ang Comprehensive Dangerous Drugs Act of 2002.
Ang PNP Bikol ay patuloy sa kampanya laban sa ilegal na droga para maisakatuparan ang demand at supply reduction ng droga at mapanatili ang maayos at ligtas na komunidad.
Source: PNP Kasurog Bicol
