Lapu-Lapu City, Cebu – Tinatayang nasa Php7 milyong halaga ng shabu ang nakumpiska ng pulisya sa suspek na naaresto sa ikinasang buy-bust operation sa Lapu-Lapu City nito lamang Miyerkules, Mayo 25, 2022.
Kinilala naman ni Police Major Joey Bicoy, Hepe ng City Intelligence Unit ng Lapu-Lapu City Police Office, ang naarestong suspek na si Melvin Salazar, 32, residente ng Barangay Maribago, Lapu-Lapu City.
Ayon kay Police Major Bicoy, nasakote ang suspek bandang 2:00 ng hapon sa Sitio Firecrash, Barangay Bangkal, Lapu-Lapu City sa matagumpay na operasyon na isinagawa ng mga operatiba ng City Intelligence Unit-LLCPO katuwang ang iba pang mga ahensya ng pamahalaan.
Ayon pa kay Police Major Bicoy, nakuha mula kay Salazar ang nasa mahigit isang kilo ng hinihinalang shabu na may tinatayang halaga na umabot sa humigit kumulang Php7,000,000.
Nahaharap ang naturang suspek sa kasong paglabag sa RA 9165 o ang Comprehensive Dangerous Drugs Act of 2002.
Ang matagumpay na pagkakaaresto ng naturang suspek ay resulta ng maayos at pinaigting na kampanya ng PNP laban sa ilegal na droga at maging sa iba’t ibang uri ng kriminalidad sa naturang rehiyon.
###
