Nakumpiska ng Northern Police District – District Drug Enforcement Unit ang tinatayang Php782,000 halaga ng shabu mula sa isang hinihinalang tulak ng droga nito lamang Sabado, Abril 5, 2025 sa kahabaan ng Baltazar Street, Barangay Malinta, Valenzuela City.
Kinilala ni Police Brigadier General Josefino D. Ligan, District Director ng Northern Police District, ang suspek na si alyas “Gio”, 19 anyos, binata, at residente ng Valenzuela City.
Nakumpiska mula sa suspek ang tinatayang 115 gramo ng hinihinalang shabu na may Standard Drug Price (SDP) na Php782,000, isang kalibre .38 Smith and Wesson revolver na may tatlong bala at may serial number na hindi na mabasa.
Kasong paglabag sa Republic Act 9165 (Comprehensive Dangerous Drugs Act of 2002) at Republic Act 10591 (Comprehensive Firearms and Ammunition Regulation Act), kaugnay ng Batas Pambansa 881 (Omnibus Election Code) ang kakaharapin ng suspek.
Ipinahayag naman ni PBGen Ligan, ang kanyang pagbati at mataas na pagpapahalaga sa NPD-DDEU sa kanilang dedikasyon, sipag, at matagumpay na pagtutulungan upang mapanatiling ligtas ang mga lansangan ng CAMANAVA mula sa banta ng ilegal na droga at iba pang krimen.
Source: NPD PIO
Panulat Ni PMSG Gargantos, RM
