Quezon City — Umabot sa Php782,000 halaga ng hinihinalang shabu ang nakulimbat ng Quezon City Police District sa kanilang buy-bust operations nito lamang Miyerkules, Hulyo 6, 2022.
Ayon kay NCRPO Regional Director, PMGen Felipe R Natividad, dakong 12:15 ng madaling araw naaresto ng mga operatiba ng Station Drug Enforcement Unit, Police Station 3 at PDEA ang dalawang suspek sa kahabaan ng NDR sa ilalim ng Tulay, Brgy. Unang Sigaw, Quezon City.
Kinilala ni PMGen Natividad ang mga suspek na sina Marvin Amaro y Gacho, 35 at John Christopher Arpon y Ramos, 23.
Nakuha sa dalawa ang humigit-kumulang 15 gramo ng hinihinalang shabu na tinatayang Php102,000 ang halaga.
Samantala, bandang ala-una ng madaling araw naman naaresto sa harap ng Roosevelt Apartelle sa kahabaan ng FPJ Ave. Brgy. Katipunan, Quezon City ang tatlong suspek ng pinagsanib na pwersa ng Station Drug Enforcement Unit ng Masambong Police Station 2 at PDEA.
Kinilala ang mga naarestong suspek na sina Amor Furagganan y Caparas, 44, Ronald Pedrito Dela Cruz y Carera, 29, at Karmjit Singhparmar y Cortes, 34.
Narekober mula sa mga suspek ang humigit-kumulang 100 gramo na hinihinalang shabu at may Standard Drug Price na Php680,000.
Mahaharap ang mga suspek sa kasong paglabag sa RA 9165 o Comprehensive Dangerous Drugs Act of 2002.
“Sa kabila ng hamon na dala ng kasalukuyang krisis sa kalusugan, patuloy na magsusumikap ang PNP upang makapaghatid ng serbisyo lalo na ang tungkol sa pagpigil sa paglaganap ng droga sa bansa. Ipagpatuloy natin ang ating makakaya upang mapanatili ang kapayapaan at kaayusan sa ating komunidad,” ani PMGen Natividad.
Source: PIO NCRPO
###
Panulat ni PSSg Remelin M Gargantos
