Quezon City – Tinatayang Php773,000 halaga ng ilegal na droga ang nakumpiska sa tatlong drug suspek matapos magsagawa ng magkahiwalay na buy-bust operation ang Quezon City Police District (QCPD) nito lamang Sabado, Mayo 20, 2023.
Ayon kay Quezon City Police District Director, PBGen Nicolas Torre III, bandang alas-10:25 ng gabi nang isagawa ang operasyon ng Holy Spirit Police Station (PS 14) sa No. 2 Sarmiento Compound, Himalayan Road., Brgy. Pasong Tamo, Quezon City na nagresulta sa pagkakaaresto sa dalawang suspek na kinilala sa pangalang “Raymond” at Isabel.
Nakumpiska sa kanila ang 5,595 gramo ng Marijuana na nagkakahalaga ng Php671,000 at isang (1) unit ng digital weighing scale.
Sa kabilang banda, nagsagawa din ng operasyon ang District Drug Enforcement Unit (DDEU) at kanilang nadakip ang suspek na si Abdalla Madis, 34 at residente ng B-37, L-37, Bayer St., North Fairview, Quezon lungsod.
Nangyari ang operasyon alas-11:30 ng gabi sa harap ng Quezon City Polytechnic University, sa kahabaan ng IBP Rd., Brgy. Batasan Hills, Quezon City.
Nakumpiska sa isang di pa pinangalanan na suspek ang 15 gramo ng shabu na nagkakahalaga ng Php102,000, isang (1) pulang coin purse, isang cellular phone at buy-bust money.
Nahaharap ang suspek sa kasong paglabag sa R.A. 9165 o ang Comprehensive Dangerous Drugs Act of 2002.
“Malugod kong binabati ang ating mga pulis sa kanilang pagsisikap upang mahuli ang mga suspek at masamsam ang mga ebidensiya. Ang kanilang dedikasyon sa kanilang sinumpaang tungkulin ay siyang sanhi ng matagumpay na operasyon,” saad ni PBGen Torre III.
“Patuloy ang ating mga operasyon kontra kriminalidad para sa ikapapayapa ng buong Kamaynilaan,” ani naman ni PMGem Edgar Alan Okubo, NCRPO Regional Director.
Source: PIO QCPD
Panulat ni PSSg Remelin M Gargantos
