Angeles City – Nasabat ang tinatayang Php754 milyon halaga ng shabu sa magkahiwalay na buy-bust operation ng PNP at PDEA sa Angeles City nito lamang Linggo, ika-19 ng Pebrero 2023.
Kinilala ni Police Colonel Juritz Rara, City Director ng Angeles City Police Provincial Office, ang mga suspek na nahulihan ng Php550,800,000 halaga ng shabu na sina alyas “Zhang”, Chinese National, 51, residente ng Malate, Manila at alyas “Reizel”, Filipino, 30, residente ng Muzon, San Juan, Batangas.
Ayon kay Police Colonel Rara, nasabat naman ang 204 milyon halaga ng shabu sa mga suspek na kinilala na sina alyas “Yi”, Chinese National, lalaki, 49, residente ng Jose Abad Santos Ave., Tondo, Manila at alyas “Mark”, Filipino, 23, residente ng Lucena, Quezon Province.
Tinatayang nasa Php754,800,000 halaga ng ilegal na droga ang nakumpiska sa pinagsanib pwersa ng Philippine Drug Enforcement Agency-National Capital Region, Angeles City Police Office at PNP Drug Enforcement Group-Special Operation Unit 3.
Nahaharap ang mga suspek sa kasong paglabag sa RA 9165 o Comprehensive Dangerous Drugs Act of 2002.
Patuloy ang PNP at PDEA sa pagpapaigting sa pangangampanya laban sa ilegal na droga para sa kaayusan at seguridad ng ating bansa.
Source: Angeles City Police Office
Panulat ni Police Corporal Jeselle Rivera/RPCADU3
