Dasmariñas City, Cavite – Tinatayang Php748,000 halaga ng shabu ang nasabat sa dalawang High Value Individual (HVI) sa isinagawang PNP buy-bust nito lamang Setyembre 17, 2022.
Kinilala ni Police Lieutenant Colonel Rodel Ban-o, Chief, Regional Police Drug Enforcement Unit 4A, ang suspek na sina Neolan Bulan Suarez, 31, walang asawa, walang trabaho at Raymundo Joe Dalawang Bayan David, 30, walang asawa, construction worker; pawang High Value Individual at residente ng Brgy. Datu Esmael, Dasmariñas City, Cavite.
Ayon kay PLtCol Ban-o, bandang 7:18 ng gabi naaresto ang dalawang suspek sa Brgy. Burol Main, Dasmarinas City, Cavite ng pinagsamang operatiba ng Regional PNP Drug Enforcement Unit 4A, Regional Intelligence Unit 4A, PNP-Intelligence Group, PNP Drug Enforcement Unit Cavite Police Provincial Office at Dasmariñas City Police Station.
Narekober mula sa mga suspek ang tatlong pirasong heat-sealed transparent plastic sachet ng pinaghihinalang shabu na may timbang na 110 gramo at tinatayang nagkakahalaga ng Php748,000, isang pirasong tunay na Php1,000 bill na may Serial No. TF527527, at 79 pirasong pekeng Php1,000 bill bilang boodle money.
Nahaharap ang dalawang suspek sa kasong paglabag sa Section 5 at 11, Article II ng Republic Act 9165 o Comprehensive Dangerous Drugs Act of 2002.
Patuloy ang Cavite PNP sa lalong pagpapaigting sa kampanya laban sa ilegal na droga at hinihikayat ang mga mamamayan na makiisa sa tuluyang pagsugpo ng talamak na pagbebenta at paggamit ng droga para sa ligtas, maayos at mapayapang komunidad.
Source: Regional Police Drug Enforcement Unit 4A
Panulat ni Police Staff Sergeant Donabel Dulin
