Nakumpiska ang Php748,000 halaga ng ilegal na droga mula sa naarestong dalawang High Value Individual sa buy-bust operation na isinagawa ng Zaragoza Municipal Police Station sa Barangay Concepcion West, Zaragoza, Nueva Ecija nito lamang ika-20 ng Pebrero 2025.
Kinilala ni Police Colonel Ferdinand D Germino, Provincial Director ng Nueva Ecija Police Provincial Office, ang mga suspek na sina alyas “Daryl”, 22 taong gulang, isang van driver at alyas “Gail”, 32, isang caregiver, pawang mga residente ng nasabing barangay.
Nakuha mula sa mga suspek ang humigit kumulang 110 gramo ng hinihinalang shabu na may Standard Drug Price na Php748,000.
Nahaharap ang mga suspek sa kasong paglabag sa Republic Act 9165 o “Comprehensive Dangerous Drugs Act of 2002”.
Ipinahayag ni PCol Germino, na ang operasyong ito ay isang mahalagang hakbang upang tuluyang matigil ang lahat ng ilegal na gawain sa komunidad. Patuloy na pinaiigting ng Nueva Ecija PNP ang mga estratehikong operasyon upang maiwasan ang krimen, mapanatili ang kapayapaan at kaayusan, at matiyak ang isang ligtas at mapayapang komunidad.
Panulat ni Pat Bulahao
