Kalaboso ang isang 43 anyos na lalaki na kabilang sa listahan ng High Value Individual (HVI) kaugnay sa ilegal na droga matapos ang ikinasang buy-bust operation ng mga tauhan ng Regional Police Drug Enforcement Unit (RPDEU) 12 sa kahabaan ng Purok 8, Barangay Poblacion, Tupi, South Cotabato nito lamang ika-14 ng Oktubre 2024.
Kinilala ni Police Major Rovi Laguardia Jardenil, Officer-In-Charge ng Tupi Municipal Police Station, ang nahuling suspek na si alyas “Sa-ed”, residente ng Datu Abdullah Sangki, Maguindanao.
Nakumpiska mula sa suspek ang 109.7 gramo ng hinihinalang shabu na tinatayang may halaga na nasa Php745,960, isang pirasong Php1,000 bill, at siyam na piraso ng Php1,000 fake money bill na ginamit bilang boodle money.
Nahaharap naman ang suspek sa kasong paglabag sa Republic Act 9165 o “Comprehensive Dangerous Drug Act of 2002”.
Tuloy-tuloy ang pagsasagawa ng mga operasyon ng RPDEU 12 upang masigurong ligtas ang bawat mamamayan laban sa banta ng ilegal na droga.
