Kalaboso ang tatlong indibidwal matapos mahulihan ng tinatayang Php742,000 na halaga ng Kush at paraphernalia sa isinagawang buy-bust operation ng Makati City Police Station nito lamang Biyernes, Hulyo 12, 2024.
Kinilala ni National Capital Region Police Office Regional Director, Police Major General Jose Melencio C Nartatez Jr, ang mga naarestong suspek na sina alyas “Alexis”, 24 anyos, residente ng Makati City; alyas “Edilberto”, 59 anyos, isang negosyante mula sa Quezon City; at alyas “Kim”, 24 anyos, isang freelance model na naninirahan sa Makati City.
Naganap ang operasyon ng Makati City Police Station-Drug Enforcement Unit bandang 7:00 ng gabi sa 2148 P Binay Street, Barangay Bangkal, Makati City na humantong sa pagkarekober ng 410 gramo ng hinihinalang Kush na may Standard Drug Price na Php574,000.
Nakumpiska ang 12 disposable vape na pinaghihinalaang naglalaman ng marijuana/cannabis oil, na umabot sa Php742,000 ang kabuuang tinatayang halaga ng mga nakumpiskang item.
Kabilang din sa mga nasamsam ay may label na mga vape pack na may iba’t ibang kulay, kabilang ang dilaw-berde, itim, at rosas, isang weighing scale, dalawang transparent plastic bag, isang iPhone X, at Php50,000 na buy-bust money, na binubuo ng genuine at boodle bills.
Mga reklamo para sa paglabag sa Republic Act 9165 na kilala rin bilang “Comprehensive Dangerous Drugs Act of 2002” ang isasampa laban sa mga naarestong suspek.
Pinuri ni PMGen Nartatez ang mga operatiba ng Makati City Police Station-Drug Enforcement Unit sa kanilang dedikasyon at tagumpay sa operasyong ito. “Sa patuloy na pagtutulungan ng komunidad sa paglaban sa ilegal na droga, matagumpay nating masugpo ang mga ganitong uri ng ilegal na aktibidad sa ating rehiyon. Makatitiyak ka na 24/7 nating pinangangalagaan ang ating mga komunidad hindi lamang laban sa kriminalidad kundi pati na rin sa lahat ng uri ng ilegal na droga.”
Source: RPIO NCRPO
Panulat ni PSSg Remelin M Gargantos
