Tinatayang Php714,000 halaga ng shabu ang nasamsam sa dalawang High Value Individual sa operasyon ng Bacoor PNP sa Barangay Panapaan 4, Bacoor City, Cavite nito lamang ika-08 ng Disyembre 2024.
Kinilala ni Police Brigadier General Paul Kenneth T Lucas, Regional Director ng Police Regional Office 4A, ang mga suspek na sina alyas “Tol”, residente ng Bacoor City, Cavite at “Leonard”, residente naman ng Pasay City, Manila.
Naaresto ang mga suspek bandang 12:30 ng madaling araw sa isinagawang drug buy-bust operation ng mga operatiba ng Bacoor Component City Police Station.
Nakumpiska mula sa mga suspek ang apat (4) na pirasong heat-sealed transparent plastic sachet na naglalaman ng hinihinalang shabu na tumitimbang ng higit kumulang 105 gramo at nagkakahalaga ng Php714,000, isang unit ng pulang motorsiklo, isang unit ng android cellphone, brown paper bag at mga drug-bust money.
Kasalukuyang nahaharap ang mga suspek sa kasong paglabag sa Republic Act 9165 o “Comprehensive Dangerous Drugs Act of 2002”.
Ang kapulisan ng Cavite ay patuloy na magpapatupad ng mga batas laban sa ilegal na droga at sa pamamagitan din ng pagtugon ng mga alagad ng batas sa iba’t ibang uri ng kriminalidad ay nagiging mas malakas ang pundasyon ng kaayusan at kaunlaran ng bansa tungo sa pagkamit ng mas maunlad at ligtas na Bagong Pilipinas na hinahangad ng bawat isa.
Source: Police Regional Office 4A
Panulat ni Patrolwoman Angelica Rica S Teng
