Cebu City – Tinatayang nasa mahigit Php7.8 milyong halaga ng halamang marijuana ang sinira at sinunog ng pulisya sa Cebu City nito lamang Sabado, ika-15 ng Oktubre 2022 sa Sitio Song-on, Barangay Lusaran, Cebu City.
Ayon kay PBGen Roderick Augustus Alba, Regional Director ng Police Regional Office 7, matapos makatanggap at makumpirma ng mga otoridad ang ulat patungkol sa malawak na taniman ng naturang halaman ay agad itong pinuntahan ng mga miyembro ng City Mobile Force Company, Cebu City Police Office, Naval Forces Central, 300th Air Intelligence and Security Wing (AISW), Criminal Investigation, Detection Group-Cebu at ng ilang mga opisyales ng naturang barangay.
Pagdating sa lugar ay tumambad sa mga nasabing grupo ang umano’y nasa 19,500 na tangkay ng marijuana na may Estimated Standard Drug Price na Php7,800,000.
Agad naman na binunot at sinunog ang halaman sa lugar, habang anim na tangkay nito ang kinuha at dinala sa Cebu City Forensic Unit para sa pagsusuri at magamit bilang opisyal na ebidensya sa oras na magsampa ng pormal na reklamo sa mga taong nasa likod ng naturang plantasyon.
Nagsasagawa na ng follow-up investigation ang pulisya upang tukuyin at tugisin ang mga magsasaka at iba pang sangkot sa pagpapatakbo ng plantasyon ng marijuana.
Bunsod ng matagumpay na operasyon, patuloy na kinikilala at pinapapahalagahan ng PNP ang aktibong partisipasyon ng komunidad sa paglaban sa ilegal na droga at lahat ng uri ng krimen sa naturang rehiyon.
“This is another accomplishment in our campaign against illegal drugs, and we attribute the success of this operation to the vigilance of the community. The information they shared was really useful in our police operation,” saad ni PBGen Alba.
