Nasabat ng mga otoridad ang Php7,200,000 halaga ng marijuana bricks mula sa isang High Value Individual sa ikinasang buy-bust operation sa Camp 4, Kennon Road, Tuba, Benguet nito lamang ika-19 ng Marso 2024.
Ayon kay Police Colonel Joseph Bayongasan, Officer-In-Charge, Benguet Police Provincial Office, ang matagumpay na operasyon ay ikinasa ng pinagsanib na pwersa ng Philippine Drug Enforcement Agency – 4A, PDEA Cordillera Administrative Region, PDEA Abra, Baguio City PNP, Benguet PNP at Tuba Municipal Police Station.
Kinilala ni PCol Bayongasan ang suspek na si alyas “Arnel”, 26 anyos, High Value Individual, magsasaka at residente ng Kibungan, Benguet kung saan nakumpiska mula sa kanya ang 60 kilos na marijuana bricks na naka-tubular at tinatayang may Standard Drug Price na Php7,200,000.
Ang suspek ay mahaharap sa kasong paglabag sa Republic Act 9165 o Comprehensive Dangerous Drugs Act of 2002, habang ang mga nakumpiskang kontrabando ay dinala sa PDEA-CAR para sa tamang disposisyon.
Ang pagkakahuli sa nasabing suspek at pagsamsam sa mga kontrabando ay patunay na ang mga kapulisan katuwang ang iba pang hanay ng gobyerno ay patuloy sa pagpapaigting ng kanilang kampanya kontra ilegal na droga tungo sa pagkamit ng isang drug-free na bansa tungo sa Bagong Pilipinas.
Panulat ni Pat Melanie L Amoyong
