Panamao, Sulu – Tinatayang Php693,000 halaga ng shabu ang nasabat sa dalawang naarestong High-Value Target sa buy-bust operation ng PNP at PDEA, nito lamang Martes, Mayo 17, 2022.
Kinilala ni PBGen Arthur Cabalona, Regional Director, Police Regional Office Bangsamoro Autonomous Region, ang mga suspek na sina Belyamer Ejan alyas “Bel” at Ben Ejan alyas “Rids” kasama ang kanilang mga kasabwat na kinilalang sina Dasimir Samudi alyas “Das” at Jimboy Muhalim alyas “Jimboy”.
Ayon kay PBGen Cabalona, nadakip ang mga suspek sa Brgy. Lower Patibulan, Panamao, Sulu matapos makabili ang poseur buyer ng isang pakete na naglalaman ng hinihinalang shabu na tinatayang may timbang na 50 gramo na nagkakahalaga ng Php340,000.
Ayon pa kay PBGen Cabalona, nakuha mula sa mga suspek ang tatlo pang pakete ng hinihinalang shabu na may timbang na 52 gramo na nagkakahalaga ng Php353,000, drug paraphernalia, at perang ginamit bilang buy-bust money.
Dagdag pa ni PBGen Cabalona, ang mga suspek ay naaresto ng pinagsanib puwersa ng Philippine Drug Enforcement Unit Sulu, Sulu Police Provincial Office Provincial Intelligence Unit, Panamao Municipal Police Station, 1st at 2nd Provincial Mobile Force Company, Regional Intelligence Unit 9, National Intelligence Coordinating Agency 9, Marine Battalion Landing Team 7, 4th Marine Brigade, at 4 Marine Corps Intelligence Command-MCIBN.
Ipagpapatuloy ng PRO BAR at mas pagsisikapan na labanan ang ilegal na droga at iba pang uri ng kriminalidad sa rehiyong Bangsamoro.
###
Panulat ni Charlie Nasroden Corpuz
