Nakumpiska ang tinatayang 101 kilo ng hinihinalang shabu na nagkakahalaga ng Php680 milyon mula sa dalawang High Value Target (HVT) sa isinagawang buy-bust operation ng mga awtoridad sa Friendship Highway, Barangay Sto. Domingo, Angeles City, Pampanga nito lamang Miyerkules, ika-14 ng Mayo 2025.
Pinangunahan ng Philippine Drug Enforcement Agency – Intelligence Service (PDEA IS) sa pamumuno ni IAI Bayani Alpon II ang operasyon, katuwang ang PDEA RO NCR – RSET 2, PDEA Pampanga Provincial Office, Armed Forces of the Philippines – Counter Intelligence Group (AFP CIG), kasama ang Angeles City Police Office – Drug Enforcement Unit (ACPO DEU), PNP Information Technology Management Service (PNP ITMS), Regional Intelligence Division ng PRO3, ACPO Police Station 1, PRO3 Regional Police Drug Enforcement Unit (RPDEU), City Intelligence Unit (ACPO CIU), CIT-Angeles, at RIU3, sa ilalim ng pamumuno ni Police Brigadier General Jean S Fajardo, Regional Director ng PRO3.
Kinilala ang mga suspek sa alyas na “Wang,” isang Chinese National mula Clark, at “Shania” mula San Sebastian, Tarlac City.
Kasong paglabag sa Republic Act 9165 o ang “Comprehensive Dangerous Drugs Act of 2002” ang kakaharapin ng mga suspek.
Patuloy ang pagtutulungan ng mga ahensya sa pagpuksa sa ilegal na droga bilang bahagi ng kampanya ng pamahalaan para sa ligtas at maayos na Bagong Pilipinas.
Panulat ni Pat Lixen Reyz A Saweran
