Tinatayang Php680,000 halaga ng shabu ang nasamsam sa tatlong High Value Individual sa isinagawang buy-bust operation ng San Pablo PNP sa Barangay San Francisco, San Pablo, Laguna nito lamang ika-01 ng Pebrero 2025.
Kinilala ang mga suspek na sina alyas “Darwin”, 39 taong gulang, “Brgyan”, 37 taong gulang at “Darren”, 37 taong gulang, pawang mga residente ng San Pablo, Laguna.
Naaresto ang mga suspek bandang 12:30 ng madaling araw sa nasabing barangay sa pagtutulungan ng mga operatiba ng San Pablo Component City Police Station at Laguna Provincial Drug Enforcement Unit.
Nakumpiska mula sa mga suspek ang isang transparent plastic sachet at isang knot-tied plastic na naglalaman ng hinihinalang shabu na tumitimbang ng higit kumulang 100 gramo at nagkakahalaga ng Php680,000 at mga ginamit bilang buy-bust money.
Kasalukuyang nahaharap ang mga suspek sa kasong paglabag sa Republic Act 9165 o “Comprehensive Dangerous Drugs Act of 2002”.
Ang tagumpay ng operasyon ng Laguna PNP kontra ilegal na droga ay nakikita sa pagbaba ng kriminalidad, pagkakasabat ng malaking halaga ng droga at pagkakahuli sa mga pangunahing personalidad na sangkot sa bentahan ng ilegal na droga. Nakakatulong din ito sa pag-alis ng takot sa komunidad at pagbibigay ng mas ligtas na kapaligiran para sa mga mamamayan.
Source: Pro 4A
Panulat ni Patrolwoman Angelica Rica S Teng
