Caloocan City — Umabot sa Php680,000 halaga ng shabu ang nasamsam sa isang dalagita sa isinagawang buy-bust operation ng Caloocan City Police Station nito lamang Linggo, Hunyo 4, 2023.
Kinilala ni PBGen Ponce Rogelio Peñones Jr, District Director ng NPD, ang suspek na si alyas “Dada”, 21 years old, single, vendor at residente ng Cloverleaf Market, Barangay Balingasa, Balintawak, Quezon City.
Ayon kay PBGen Peñones Jr, nagsagawa ng operasyon ang mga operatiba ng Intelligence Section ng istasyon matapos makatanggap ng sumbong ukol sa ilegal na aktibidad ng suspek, bandang alas-7:00 ng gabi sa kahabaan ng Phase 12, Riverside, Barangay 188, Tala, Caloocan City na nagresulta sa pagkakaaresto ni alyas “Dada.”
Nakumpiska sa dalagita ang isang knot-tied transparent plastic sachet na naglalaman ng pinaniniwalaang shabu na tumitimbang ng 100 gramo at tinatayang may Standard Drug Price na Php680,000 at isang coin purse pouch na kulay asul.
Mahaharap ang suspek sa kasong paglabag sa RA 9165 o Comprehensive Dangerous Drugs Act of 2002.
Patuloy ang pagpupursigi ng kapulisan ng Northern Metro sa pagsasagawa ng kampanya kontra ilegal na droga at anumang uri ng kriminalidad upang matiyak na payapa at ligtas ang komunidad.
Source: NPD PIO
Panulat ni PSSg Remelin M Gargantos
