Cebu City – Tinatayang Php680,000 halaga ng shabu ang nasabat sa isang High Value Individual sa buy-bust operation ng mga operatiba ng Cebu City PNP sa Brgy. Kalunasan, Cebu City nito lamang Lunes, Hulyo 18, 2022.
Kinilala ni Police Colonel Ernesto Salvador T Tagle, Acting City Director ng Cebu City Police Office, ang suspek na si Elmer Alfonso Camia alyas “Kape”, 37, residente ng Unit 5, Opra, Brgy. Kalunasan, Cebu City at kabilang sa High Value Individual sa Rehiyon 7.
Ayon kay PCol Tagle, naaresto si Camia bandang 4:00 ng hapon ng mga operatiba ng City Intelligence Unit at City Drugs Enforcement Unit ng Cebu City Police Office.
Nakuha mula sa suspek ang 21 na medium heat-sealed transparent plastic sachet ng hinihinalang shabu na may timbang na hindi bababa sa 100 gramo at may Standard Drug Price na Php680,000, isang sling bag at buy-bust money.
Nahaharap sa kasong paglabag sa Section 5 at 11, Article II ng Republic Act 9165 o ang Comprehensive Dangerous Drugs Act of 2002 ang suspek.
Samantala, ang mga nakuhang ebidensya ay dinala naman sa PNP Forensic Unit para sa pagsusuri.
Ang Cebu City PNP sa pamumuno ni PCol Ernesto Salvador Tagle ay hindi titigil na sugpuin ang ilegal na droga sa lungsod at iba pang krimen upang mapanatili ang maayos at ligtas na komunidad.
###
