Arestado ang dalawang High Value Individual makaraang makumpiskahan ng tinatayang Php680,000 na halaga ng shabu sa ikinasang buy-bust operation ng mga operatiba ng Pasay City Police Station nito lamang Lunes, Abril 8, 2024.
Pinangalanan ni PBGen Mark D Pespes, District Director ng Southern Police Station, ang mga suspek na sina alyas “Ata,” 16 anyos na isang CICL; at alyas “Ced,” 20 taong gulang.
Isinagawa ang operasyon ng pinagsanib pwersa ng SPD Drug Enforcement Unit kasama ang SPD-DID, DMFB, PDEA-SDO at Pasay City Police Station Drug Enforcement Unit sa Celeredad Street, Barangay 111, Pasay City bandang 5:00 ng hapon na nagresulta sa pagkakadakip sa dalawang binatilyong suspek.
Nakumpiska sa operasyon ang humigit-kumulang 100 gramo ng hinihinalang shabu na inilagay sa dalawang knot tied plastic sachet, isang genuine Php1,000 bill, 159 piraso ng Php1,000 boodle money at isang white/rose gold Xiaomi android phone.
Ibibigay ang CICL sa Bahay Pag-asa para sa kaukulang disposisyon habang nakakulong si alyas Ced sa Pasay City Police Detention Facility.
Sila ay mahaharap sa kasong paglabag sa Republic Act 9165 o Comprehensive Dangerous Drugs Act of 2002.
Patuloy ang kapulisan ng Southern Metro sa paghuli sa mga taong sangkot sa pagbebenta at paggamit ng ilegal na droga upang mapanatiling ligtas ang mga mamamayang nasasakupan tungo sa Bagong Pilipinas.
Source: SPD PIO
Panulat ni PSSg Remelin M Gargantos
