Benguet – Tinatayang nasa Php662,000 halaga ng marijuana ang binunot at sinunog ng mga awtoridad sa walong plantation sites sa Sitio Mangga-an, Proper, Lambi, Uwasan at Nagawa, Brgy. Kayapa, Bakun, Benguet nito lamang Enero 27, 2023.
Ayon kay Police Brigadier General Mafelino Bazar, Regional Director ng Police Regional Office Cordillera, nadiskubre ang 3,310 piraso ng Fully-Grown Marijuana Plants na may Standard Drug Price na Php662,000 na may kabuuang sukat na 610 square meters.
Matagumpay ang operasyon dahil sa pagsisikap ng pinagsanib na puwersa ng Bakun Municipal Police Station, Provincial Drug Enforcement Unit Benguet, Provincial Intelligence Unit, 143rd Special Action Company, 14th Special Action Battalion ng PNP Special Action Force.
Samantala, agad namang binunot at sinunog ang naturang marijuana sa lugar ng taniman at walang naitalang cultivator.
Ang Benguet PNP ay patuloy na papaigtingin ang pakikipag-ugnayan sa komunidad para mahuli ang mga nagtanim ng ipinagbabawal na halaman at papaigtingin pa ang pagpapatrolya para mapuksa ang mga ilegal na halaman sa kanilang nasasakupan.
Source: Police Regional Office Cordillera-PIO
