Arestado ang dalawang High Value Individual, matapos makuhanan ng aabot sa Php625,000 na halaga ng shabu sa ikinasang buy-bust ng kapulisan sa Barangay Rizal Pala-Pala 1, City Proper, Iloilo City nito lamang Pebrero 21, 2024.
Ang operasyon ay inilunsad bandang 2:30 ng hapon sa pangunguna ng mga operatiba ng Iloilo City Police Station 1 bilang lead unit, kasama ang City Drug Enforcement Unit, ICPO SWAT, ICMFC, HPG6 at PDEG SOU6.
Kinilala ni Police Captain Roque Gemino III, hepe ng Iloilo City Police Station 1, ang mga naaresto na sina alyas “Erme” at alyas “Christo” na parehong naitala bilang mga High Value Individual.
Ayon kay PCpt Gemino, nakuha sa mga arestado ang 19 na plastic sachets ng pinaghihinalaang shabu na tumitimbang ng 92 gramo, buy-bust money, at ilang mga non-drug items.
Ang dalawang suspek ay nahaharap sa kasong paglabag sa Republic Act 9165 o ang Comprehensive Dangerous Drugs Act of 2002.
Pinuri naman ni Police Brigadier General Jack L Wanky, Acting Regional Director ng PRO6 ang matagumpay na operasyon na ito. Aniya, “Ang matagumpay na operasyon na ito ay nagpapatunay lamang na ang mga kapulisan ay hindi tumitigil sa paglaban sa mga ilegal na droga.”
Patuloy ang panawagan ni Pangulong Ferdinand R Marcos Jr. sa bawat Pilipino na maging bahagi ng ating laban sa ilegal na droga. Maging mapagbantay, mag-ulat ng mga aktibidad na may kaugnayan sa droga. Kaisa ng bawat Pilipino ang Pambansang Pulisya sa pagpuksa sa lahat ng uri ng kriminalidad at ilegal na gawain.
Source: Regional Public Information Office 6
Panulat ni Pat Glydel V Astrologo
