Lucban, Quezon – Tinatayang Php616,488 halaga ng ilegal na droga at baril ang nasabat sa dalawang suspek sa operasyon ng Lucban PNP at PDEA Quezon nito lamang Miyerkules, Disyembre 21, 2022.
Kinilala ni Police Colonel Ledon Monte, Provincial Director ng Quezon Police Provincial Office, ang dalawang suspek na sina alyas “Kirby”, 37, magsasaka, residente ng Brgy. May-it, Lucban, Quezon at alyas “Joel”, 46, construction worker at residente ng Brgy. Ayuti, Lucban, Quezon.
Ayon kay PCol Monte, bandang 12:20 ng hapon naaresto ang dalawang suspek sa Sitio Ilaya, Brgy. Manasa, Lucban, Quezon ng mga tauhan ng Lucban Municipal Police Station at Philippine Drug Enforcement Agency-Quezon.
Narekober sa dalawang suspek ang pitong heat-sealed transparent plastic sachets na naglalaman ng hinihinalang shabu na may timbang na 30.22 gramo na nagkakahalaga ng Php616,488, isang Colt AR-15 Cal. 9mm, isang magazine, pitong bala, isang back pack, tatlong pirasong Php1,000 bill na ginamit bilang buy-bust money at isang pulang card holder.
Nahaharap ang dalawang suspek sa paglabag sa section 5 at 11 ng Article II ng Republic Act 9165 o Comprehensive Dangerous Drugs Act of 2002 at RA 10591 o Comprehensive Firearms and Ammunition Regulation Act.
Ang tagumpay ng Quezon PNP laban sa pagsugpo ng ilegal na droga ay bunga ng pinaigting na pakikipag-ugnayan at suporta ng mamamayan upang mapanatili na ligtas at maayos ang komunidad.
Panulat ni PEMS Joe Peter V Cabugon/RPCADU4A
