Iloilo City – Tinatayang Php612K na halaga ng shabu ang nasabat ng Iloilo City PNP sa isinagawang buy-bust operation sa Zone 2, Brgy. Baldoza, Lapaz, Iloilo City, nito lamang ika-8 ng Enero 2024.
Kinilala ni Police Lieutenant Colonel Antonio Benitez Jr, Hepe ng CDEU, ang nahuling suspek na si alyas “Mygelyn”, isang Newly Identified High Value Individual.
Inilunsad ang buy-bust operation bandang 5:17 ng hapon sa pangunguna ng mga operatiba ng Iloilo City Drug Enforcement Unit, kasama ang ICPS2, ICPS1, SWAT at ng ICPS4 bilang mga support unit.
Sa nasabing operasyon, nakuha sa pag-iingat ng suspek ang higit-kumulang 90 gramo ng suspected shabu, na nagkakahalaga ng Php612,000.
Bukod sa droga ay nabawi rin sa suspek ang ginamit na buy-bust money kasama ng ilang non-drug items.
Nahaharap ang suspek sa kasong paglabag sa RA9165 o Comprehensive Dangerous Drugs Act of 2002.
Samantala, patuloy naman ang hot pursuit operation sa isa pang suspek na nakatakas na kinilalang si alyas “Russel”, para sa mabilisang pagkakadakip nito.
Ang matagumpay na operasyon ng ating mga kapulisan ay patunay lamang ng mas pinaigting at mas pinalawak na kampanya laban sa mga ilegal na droga sa siyudad ng Iloilo.
