Cebu City – Arestado ang 34-anyos na lalaking HVI sa Cebu City matapos makuhanan ng tinatayang nasa mahigit Php6.9 milyong halaga ng shabu sa ikinasang buy-bust operation ng mga operatiba ng Police Station (PS) 3, Cebu City Police Office (CCPO) noong Sabado sa Brgy. Tejero, Cebu City, noong Disyembre 3, 2022.
Ayon kay Police Colonel Ireneo Dalugdog, City Director ng CCPO, ang suspek ay kinilalang si alyas “Richard” na kabilang sa talaan ng High Value Individual sa lungsod ay naaresto bandang alas-6 ng hapon sa operasyon na pinangunahan ni Police Major Henry Orbiso, Hepe ng PS 3.
Ayon pa kay Police Colonel Dalogdog, kabilang sa mga nakumpiska sa suspek ay ang nasa 1.015 kilo ng hinihinalang shabu na may Standard Drug Price na Php6,902,000, isang unit ng Mio 125 motorcycle, Chinese Tea Bag na ginamit na lagayan ng mga ilegal na droga, at buy-bust money.
Nahaharap ang suspek sa kasong paglabag sa Section 5 at 11, Art. 11 ng RA 9165 (Comprehensive Dangerous Drugs Act of 2002).
Pinuri naman ni Police Colonel Dalogdog ang buong puwersa ng PS3, CCPO sa kanilang pagsusumikap upang wakasan ang problema sa ilegal na droga sa lungsod.
Kasunod nito ay siniguro ng opisyal na kanila pang paiigtingin at pag-iibayuhin ang kampanya laban sa ilegal na droga at maging sa lahat ng uri ng kriminalidad para sa kaayusan, kaligtasan, at kapayapaan ng komunidad.
