Nasabat ng Cebu City PNP ang Php6.8 milyong halaga ng hinihinalang shabu mula sa isang lalaking suspek sa isinagawang buy-bust operation sa Sitio Sindulan, Barangay Mabolo, Cebu City, noong ika-1 ng Hulyo 2024.
Kinilala ni Police Colonel Ireneo B Dalogdog, City Director ng Cebu City Police Office, ang suspek na si alyas “Baldo”, 47 anyos at residente ng Sitio Sindulan, Barangay Mabolo, Cebu City.
Bandang 12:47 ng madaling araw ng ikinasa ng pulisya ang buy-bust operation na nagresulta sa pagkaaresto ng suspek at pagkasabat ng 6 plastic sachets at 12 plastic packs ng hinihinalang shabu na may timbang na 1,005 gramo at Standard Drug Price na Php6,834,000, habagat backpack at buy-bust money.
Ang matagumpay na operasyon ay bunga ng pinagsanib pwersa ng Mabolo Drug Enforcement Unit at City Intelligence Unit.
Mahaharap ang suspek sa kasong paglabag sa Republic Act 9165 o Comprehensive Dangerous Drugs Act of 2002.
Ang kapulisan ng Cebu City ay patuloy sa pagpapaigting ng kanilang kampanya kontra ilegal na droga. Ito ay alinsunod sa isa sa pangunahing prayoridad ng pamahalaan na labanan ang mga sindikato ng droga sa pamamagitan ng pagpigil sa kanilang mga ilegal na aktibidad at pagbuwag sa kanilang mga operasyon.
Source: CCPO SR
Panulat ni Pat Grace P Coligado
