Negros Oriental – Kasunod ng paghahain ng Search Warrant ng PNP ay naaresto ang dalawang suspek na nakumpiskahan ng Php6.8 milyong halaga ng shabu sa operasyon ng Negros Oriental Police Provincial Office (NOPPO) sa Purok Gumamela, Brgy. Calingdagan, Dumaguete City, Negros Oriental, noong Sabado, Agosto 19, 2023.
Dakong alas-4:30 ng umaga ng matagumpay na inilunsad ng mga pinagsanib na puwersa ng mga tauhan ng Provincial Drug Enforcement Unit, Provincial Intelligence Unit at Dumaguete City Police Station ng NOPPO ang anti-illegal drugs operation.
Kinilala ni Police Captain John Paul Melon, Chief PDEU, ang nadakip na suspek na sina “Rok-Rok” at “Bing-Bing”, kapwa residente ng nasabing barangay at napabilang sa talaan ng High Value Individual.
Narekober sa operasyon ang tinatayang nasa humigit kumulang isang kilo ng hinihinalang shabu na may Standard Drug Price na Php6,800,000.
Tiniyak ng kapulisan ng naturang probinsya ang tuloy-tuloy na pagpapahusay at pagpapaigting ng kanilang mga hakbangin upang pigilan at lutasin ang problema sa ilegal na droga at ang mapanganib na dulot nito sa komunidad.
