Nagpamalas nang pagmamalasakit sa bayan ang ipinakita ng isang Barangay Kagawad matapos niyang isurender sa pulisya ang isang sealed plastic pack na naglalaman ng hinihinalang ilegal na droga sa Barangay Binacas, Lubang, Occidental Mindoro nito lamang ika-28 ng Agosto 2024.
Ayon kay Police Captain Frean P Cadiao, Acting Chief of Police ng Lubang Municipal Police Station, habang naglalakad ang Kagawad sa dalampasigan bandang alas 6:00 ng umaga, natagpuan niya ang isang sky blue plastic pack na may lamang puting kristal na substance. Agad niyang inisip na ito ay maaaring shabu, na tinatayang tumitimbang ng 1,000 gramo at may halagang Php6.8 milyon.
Ang pinaghihinalaang ilegal na droga ay nasa kustodiya na ng pulisya at ipapadala sa Provincial Forensic Unit sa San Jose, Occidental Mindoro para sa pagsusuri.
Ang hakbang na ito ng Kagawad ay nagpapakita na ang bawat mamamayan ay may mahalagang papel sa pagpapanatili ng kaayusan at kapayapaan sa bansa. Ang kanilang pakikipagtulungan sa mga awtoridad ay susi upang makamit ang inaasam na kapayapaan at seguridad ng Bagong Pilipinas.
Source: Lubang MPS
Panulat ni Pat Ana Rose D Guadaña
