Nasabat ang tinatayang Php5,054,000 halaga ng smuggled cigarettes sa dalawang indibidwal sa isinagawang checkpoint operation ng mga awtoridad sa Barangay Kenebeka, Datu Odin Sinsuat, Maguindanao del Norte nito lamang ika-25 ng Agosto 2024.
Kinilala ni Police Colonel Salman H Sapal, Provincial Director ng Maguindanao del Norte Police Provincial Office, ang mga suspek na sina alyas “Ryan”, 33 anyos, at si alyas “Baron”, 48 anyos na pawang residente ng Davao City.
Bandang 8:30 ng gabi, nang makatanggap ng impormasyon ang Regional Drug Enforcement Unit/RIAT-CTU PROBAR galing sa isang confidential informant tungkol umano sa isang sasakyan na lulan ang mga pinaniniwalaang smuggled na sigarilyo, agad naman nakipag-ugnayan sa Datu Odin Sinsuat MPS, at 1st Provincial Mobile Force Company MDN PPO at agarang ikinasa ang naturang operasyon na nagresulta sa pagkakakumpiska ng mga kahong-kahon na smuggled na sigarilyo at pagkakaaresto ng mga suspek.
Nakuha mula sa operasyon ang 133 kahon ng hindi dokumentadong New Berlin Cigarettes brand, walang BIR stamps, at walang malinaw na graphic warning components na may market value na Php38,000 kada kahon at may kabuuang halagang Php5,054,000.
Kasong paglabag sa Section 1401 (Unlawful Importation or Exportation) ng Republic Act 10863 na kilala rin bilang Customs Modernization and Tariff Act (CMTA) ang kakaharapin ng mga suspek.
Ang matagumpay na pagkakakumpiska ng mga kontrabando ay resulta ng mas pinaigting ng Maguindanao del Norte PNP sa operasyon laban sa kriminalidad, police visibility, at border control sa nasasakupang lugar.
Panulat ni Patrolwoman Veronica Laggui
