Tinatayang Php578,000 halaga ng hinihinalang shabu ang nakumpiska at arestado ang dalawang High Value Individuals sa isinagawang buy-bust operation ng mga awtoridad sa Barangay San Pedro Cutud, City of San Fernando, Pampanga nito lamang Sabado, ika-24 ng Agosto 2024.
Kinilala ni Police Lieutenant Colonel Roy Augustus F Calulot, Acting Chief ng San Fernando City Police Station, ang mga suspek na sila alyas “Jocard”, 47 anyos at alyas “Tetey”, 46 anyos na parehong residente ng nasabing lugar.
Naging matagumpay ang mga tauhan ng Station Drug Enforcement Unit ng San Fernando City Police Station matapos ikasa ang buy-bust operation at narekober sa mga suspek ang limang pirasong heat-sealed plastic sachets na naglalaman ng hinihinalang shabu na may bigat na humigit kumulang 85 gramo na nagkakahalaga ng Php578,000 at drug bust money.
Ang mga suspek ay mahaharap sa kasong paglabag sa Section 5 at 11, Article II ng Republic Act 9165 o Comprehensive Dangerous Drugs Act of 2002.
Patuloy ang Pambansang Pulisya sa pagsugpo sa kriminalidad at sa pagpapaigting ng kampanya laban sa ilegal na droga sa ating bansa, dahil sa Bagong Pilipinas, ang gusto ng pulis, ligtas ka!
Panulat ni Pat Jilly A Peña
