Arestado ng mga operatiba ng Taguig City Police Station ang dalawang indibidwal sa isang anti-criminality operation bandang 2:15 ng madaling araw nito lamang Enero 24, 2025 sa Barangay Sta. Ana, Taguig City.
Kinilala ni Police Brigadier General Manuel Abrugena, District Director ng Southern Police District, ang mga naarestong suspek na sina alyas “Jake”, 37 anyos at isa pang suspek na si alyas “Alex”, 32 taong gulang.
Ayon kay PBGen Abrugena, bumunot ng baril ang suspek na kinilalang si alyas “Jake” sa mga pulis at sunud-sunod na nagtangkang magpaputok habang tumatakbo palayo ngunit sa kabutihang palad ay nabigong pumutok ang baril.
Sa pagkakataong iyon, dumepensa ang mga operatiba ng pulisya at pinagbabaril ang suspek na tinamaan sa kaliwang baywang at tuluyang naaresto.
Nasamsam ng mga operatiba ang walong heat-sealed sachets ng pinaniniwalaang shabu na tumitimbang ng humigit-kumulang 83 gramo, na may tinatayang street value na Php564,000; isang Smith & Wesson .38 caliber revolver na may serial number na may kargang apat na bala; isang black belt bag; orange na Yamaha Mio na motorsiklo; sari-saring ID; at iba pang personal na gamit.
Nahaharap ang mga suspek sa kasong paglabag sa Republic Act 9165 o “Comprehensive Dangerous Drugs Act of 2002”, RA 10591 o “Comprehensive Firearms and Ammunition Regulation Act” at Article 151 ng RPC kaugnay ng Omnibus Election Code.
Paalala naman ng SPD sa publiko na ipagbigay alam agad sa mga alagad ng batas ang anumang uri ng kriminalidad o iligal na aktibidad sa komunidad upang mapigilan ang paglaganap nito para sa isang mas ligtas at drug free na lipunan.
Source: SPD PIO
Panulat ni PSSg Remelin M Gargantos
