Iloilo City – Tinatayang nasa Php544,000 halaga ng shabu ang nakumpiska sa tatlong arestadong suspek sa inilunsad na drug buy-bust operation ng PNP nito lamang Lunes, Hunyo 13, 2022.
Kinilala ni Police Lieutenant Colonel Mark Anthony Darroca, Hepe ng Regional Police Drug Enforcement Unit 6, ang mga suspek na sina Archie P Tipanan alyas “Nonoy”, 35; Eden Rose T Robles, 40; at Margarita Concepcion D Sorrillo, 27.
Ayon kay PLtCol Darroca, bandang 6:50 ng gabi nang naaresto ang mga suspek sa Zone 2, Brgy. Caingin, Lapz, Iloilo City ng mga operatiba ng Regional Police Drug Enforcement Unit 6.
Ayon pa kay PLtCol Darroca, nakuha mula sa mga suspek ang 20 transparent plastic sachet na naglalaman ng hinihinalang shabu na may bigat na humigit kumulang 80 grams na may estimated Standard Drug Price na Php544,000 at iba pang non-drug items.
Nahaharap ang mga suspek sa kasong paglabag sa RA 9165 o Comprehensive Dangerous Drugs Act of 2002.
Samantala, pinasalamatan naman ni PLtCol Darroca ang mga operatiba sa matagumpay na operasyon at tiniyak ang publiko na mas paiigtingin pa nila ang mga operasyon laban sa mga ipinagbabawal na droga sa buong rehiyon.
###
