Kumpiskado ng kapulisan ng Mandaue City ang Php510,000 halaga ng hinihinalang shabu at baril mula sa isang High Value Individual sa isinagawang buy-bust operation sa Purok Grancena, Barangay Umapad, Mandaue City, noong ika-28 ng Mayo 2024.
Kinilala ni Police Major Manuel Arcayan Cabanlit, Station Commander ng Police Station 5, Mandaue City Police Office, ang suspek na si alyas “Avatar”, 39 anyos at residente ng Sitio Panagdait, Barangay Kasambagan, Cebu City.
Bandang 7:45 ng gabi ng ikinasa ng pulisya ang buy-bust operation na nagresulta sa pagkaaresto ng suspek at pagkasabat ng 21 pakete ng hinihinalang shabu na may timbang na 75 gramo at may Standard Drug Price na Php510,000, gray sling bag, isang 9mm Caliber, magazine, tatlong bala at buy-bust money.
Mahaharap ang suspek sa kasong paglabag sa Republic Act 9165 o Comprehensive Dangerous Drugs Act of 2002 at Republic Act 10591 o Comprehensive Firearms and Ammunition Regulation Act.
Ang Mandaue City PNP ay walang tigil sa pagpapaigting ng kanilang kampanya laban sa mga gumagamit at nagbebenta ng ilegal na droga upang masiguro ang kaayusan sa kanilang nasasakupan dahil sa Bagong Pilipinas, ang gusto ng pulis, ligtas ka!.
Source: MCPO SR
Panulat ni Pat Grace P Coligado
