Nakumpiska ng mga operatiba ng Benguet PNP ang tinatayang Php500,000 halaga ng marijuana sa magkahiwalay na plantasyon site sa Sitio Bagang at Sitio Dalipey, Tacadang, Kibungan, Benguet nito lamang ika-18 at 19 ng Disyembre 2024.
Ayon kay Police Colonel Joseph P Bayongasan, Provincial Director ng Benguet Police Provincial Office, ang operasyon ay pinangunahan ng mga operatiba ng Kibungan Municipal Police Station katuwang ang mga tauhan ng Provincial Drug Enforcement Unit/ Provincial Intelligence Unit, Benguet PPO, Regional Intelligence Division, PRO-CAR at Philippine Drug Enforcement Agencies-CAR.
Unang natuklasan ang plantasyon ng marijuana sa Sitio Bagang noong Disyembre 18 na may tanim na humigit kumulang 1500 piraso ng marijuana na nagkakahalaga ng tinatayang Php300,000 Standard Drug Price.
Sunod namang natuklasan ang ikalawang planstyon site ng marijuana sa Sitio Dalipey noong Disyembre 19 na may tanim na humigit kumulang 1,000 piraso ng marijuana na nagkakahalaga ng tinatayang Php200,000 Standard Drug Price.
Sa kabuuan, tinatayang Php500,000 halaga ng marijuana ang binunot at sinunog ng mga operatiba sa mismong lugar.
Patuloy naman ang panawagan ng Benguet PNP sa mga residente na itigil ang pagtatanim, pag-angkat, pagtransport at paggamit ng iligal na marijuana at droga dahil ito ay mahigpit na ipinagbabawal at may karampatang parusa sa ilalim ng Republic Act 9165.
