Pasil, Kalinga – Tinatayang Php5,760,000 halaga ng marijuana ang nasamsam ng Kalinga PNP sa isang inabandonang sasakyan sa kahabaan ng National Road, Saladao, Cagaluan, Pasil, Kalinga nito lamang Miyerkules, Nobyembre 30, 2022.
Ayon kay Police Colonel Charles Domallig, Provincial Director ng Kalinga Police Provincial Office, nasabat ng mga operatiba ng Kalinga PNP ang mga kontrabando sa loob ng isang abandonadong puting Toyota Rush na may Plate No. na NFV-9982.
Narekober sa loob ng sasakyan ang 10 pirasong tuyong dahon ng marijuana na may tinatayang bigat na 10,000 gramo na may Standard Drug Price (SDP) na Php1,200,000; tatlong pirasong tubular na naglalaman ng tuyong dahon ng marijuana at tangkay na nakabalot sa transparent na plastik na may tinatayang bigat na 3,000 gramo na nagkakahalaga ng Php360,000; 18 pirasong medium rectangular shaped na naglalaman ng tuyong dahon at tangkay ng marijuana na may tinatayang bigat na 35,000 gramo na may halaga na Php4,200,000.
Sa kabuuan, ang mga nakumpiskang marijuana ay may kabuuang timbang na 48,000 gramo na nagkakahalaga ng Php5,760,000.
Maliban dito, narekober din ang isang dilaw na plastic bag na naglalaman ng Official Receipt/Certificate of Registration na inupahan sa ilalim ng babaeng pangalan na may address sa Makati City at isang puting Toyota Rush na may Plate No. na NFV 9982.
Samantala, arestado ang drayber ng inabandonang sasakyan sa hot pursuit operation ng mga tauhan ng 2nd Kalinga Provincial Mobile Force Company, Pasil Municipal Police Station, Provincial Intelligence Unit, Provincial Drug Enforcement Unit, Tabuk City Police Office at Lubuagan Municipal Police Station nito limang Miyerkules, Disyembre 1, 2022.
Kinilala ang suspek na isang residente ng Pakak, Agbannawag, Tabuk City, Kalinga.
Patuloy ang panawagan ni PCol Domallig sa mga residente na makipag-ugnayan sa himpilan ng Pambansang Pulisya para sa anumang impormasyon na makakatulong sa pagsugpo sa ilegal na droga sa buong Kalinga.
Source: Kalinga Police Provincial Office
