Zamboanga City – Nasabat ang tinatayang Php5,145,000 halaga ng assorted smuggled cigarettes sa ikinasang seaborne patrol ng mga awtoridad nito lamang Hulyo 19, 2023.
Ayon kay Police Lieutenant Colonel Reynald Arino, Force Commander ng 2nd Zamboanga City Mobile Force Company “Seaborne”, bandang 2:50 ng madaling araw nang nagsagawa ng pagpapatrolya sa karagatan ng Brgy. Cawit, Zamboanga City, ang mga tauhan ng 2nd Zamboanga City Mobile Force Company na nagresulta sa matagumpay na pagkakasabat ng mga assorted smuggled cigarettes na lulan sa naharang na “Jungkong” clor green na may body marked “FAZZA 4”.
Narekober ang 49 mga master cases ng Astro Menthol, 40 master cases ng New Berlin (red), 50 master cases ng Bros (red), limang master cases ng Fort (green) at tatlong master cases ng Astro (red) na may kabuuang 147 master cases at may tinatayang halaga ng Php5,145,000.
Naaresto ang limang suspek na sina alyas “Yusop”, 26, residente ng Indanan Sulu; alyas “Sudisin” 40, residente ng Maimbung, Sulu; alyas “Aberkhan”, 34, residente ng Jolo, Sulu; alyas “Alsidi”, 25, residente ng Indanan Sulu; at alyas “Ilahan”, 34, residente ng Indanan Sulu, na pawang nahaharap sa kasong paglabag sa Sec. 1401 (Unlawful Importation or Exportation) ng RA 10863 na kilala rin bilang Customs Modernization and Tariff Act (CMTA).
Ang PNP ay nagpapaalala sa mamamayan na huwag gumawa ng ano mang ilegal na gawain o aktibidad upang hindi humantong sa pagkakakulong.
Panulat ni Patrolman John Ronald Tumonong/RPCADU 9
