Benguet – Tinatayang PhP472,000 halaga ng marijuana ang nadiskubre ng Kibungan PNP sa isinagawang marijuana eradication sa Sitio Talo-an, Tacadang, Kibungan, Benguet nito lamang ika-21 ng Enero 2024.
Ayon kay Police Colonel Damian Olsim, Provincial Director ng Benguet Police Provincial Office, naging matagumpay ang operasyon sa pagsisikap ng pinagsanib na pwersa ng mga tauhan ng Kibungan Municipal Police Station, Philippine Drug Enforcement Unit/Provincial Intelligence Unit, Regional Intelligence Division, Philippine Drug Enforcement Agency -Cordillera, at barangay officials ng Tacadang.
Ang operasyon ay nagresulta sa pagkadiskubre ng dalawang plantasyon ng marijuana na may kabuuang lawak na 470 square meters at may tanim na 2,360 pirasong fully grown na halaman ng marijuana na nagkakahalaga ng tinatayang Php472,000.
Dagdag pa ni PCol Olsim, bagama’t walang naaktuhang cultivator, lahat ng halaman ng marijuana ay binunot at sinunog sa nasabing lugar.
Pinuri naman ni PCol Olsim ang mga operatiba sa kanilang matagumpay na operasyon at nangakong lalong pagsisikapan ng Benguet PNP ang pagsugpo sa ilegal na droga sa kanilang nasasakupan.
Panulat ni Patrolwoman Liezle Digman
