Misamis Oriental – Tinatayang nasa Php476,000 halaga ng hinihinalang shabu ang nakumpiska sa Top 6 Regional Drug Personality sa ikinasang buy-bust operation ng mga awtoridad sa Purok 6, Brgy. San Martin, Villanueva, Misamis Oriental bandang 9:35 ng gabi nito lamang Agosto 29, 2023.
Kinilala ni Police Major Remz Marion Serrano, Hepe ng Villanueva Municipal Police Station, ang dalawang suspek na sina alyas “Bongkoy”, 44 at residente ng Zone 2, Brgy. Tagoloan, Misamis Oriental na tinaguriang Top 6 Regional Level Priority List ng PNP/PDEA at kasama nito na si alyas “John” 43 anyos, residente ng Sitio Silao, Brgy. Poblacion 1, Villanueva Misamis Oriental.
Sa naturang operasyon nakuha ang 19 na pakete ng hinihinalang shabu na may bigat na 70 na gramo na may Standard Drug Price na Php476,000; isang plastic na botelya; isang black belt bag; isang digital weighing scale; isang Huawei Cellphone; dalawang disposable lighter; isang Improvised Pipe at isang pirasong Php1,000 bill na ginamit bilang buy-bust money.
Nahaharap ang dalawang suspek sa kasong paglabag sa Section 5 at 11, Article II ng RA 9165 o Comprehensive Dangerous Drugs Act of 2002.
Ang Villanueva PNP ay patuloy sa pagsasagawa ng mga operasyon laban sa ilegal na droga at anumang uri ng kriminalidad sa tulong ng mamamayan para mapanatili ang maayos at payapang komunidad.
