Rodriguez, Rizal – Tinatayang Php465,528 na halaga ng shabu ang nasabat sa dalawang suspek kabilang ang isang miyembro ng Bautista Drug Group sa buy-bust operation ng Rizal PNP sa kahabaan ng Sitio Tanag Brgy. San Isidro Rodriguez, Rizal nito lamang Linggo, Disyembre 18, 2022.
Kinilala ni Police Colonel Dominic Baccay, Provincial Director ng Rizal Police Provincial Office, ang dalawang suspek na sina alyas “Emil”, 40, miyembro ng Bautista Drug Group at alyas “Elvir”, 27, pawang mga residente ng Rodriguez, Rizal.
Ayon kay PCol Baccay, bandang 9:35 ng gabi naaresto ang dalawang suspek sa naturang barangay sa pinagsanib na pwersa ng Rodriguez Municipal Police Station at Rizal Provincial Intelligence Unit/Drug Enforcement Unit.
Narekober sa dalawang suspek ang siyam na heat-sealed plastic sachets ng hinihinalang shabu na may bigat na 68.46 gramo na nagkakahalaga ng Php465,528, isang cellphone, isang pirasong Php500 bill, limang pirasong Php100 bill na ginamit bilang buy-bust money, isang gunting, isang pouch at isang lighter.
Nahaharap ang dalawang suspek sa kasong paglabag sa Republic Act 9165 o Comprehensive Dangerous Drugs Act of 2002.
Ang tagumpay ng Rizal PNP laban sa ilegal na droga at iba pang krimen ay bunga ng pinaigting na suporta at pakikipag-ugnayan ng mamamayan upang manatiling ligtas at maayos ang komunidad.
Panulat ni PEMS Joe Peter V Cabugon/RPCADU4A
