Tinatayang Php462,400 halaga ng shabu ang nasabat sa buy-bust operation sa dalawang drug suspek ng Biñan PNP sa Barangay Malaban, Biñan City, Laguna nito lamang ika-16 ng Oktubre 2024.
Kinilala ni Police Colonel Gauvin Mel Y Unos, Provincial Director ng Laguna Police Provincial Office, ang mga suspek na sina alyas “Nover” at “Burek”, parehong residente ng Biñan City, Laguna.
Naaresto ang mga suspek bandang 2:15 ng madaling araw sa isinagawang operasyon ng mga tauhan ng Biñan Component City Police Station at nakumpiska mula sa mga suspek ang hinihinalang shabu na tumitimbang ng higit kumulang 68 gramo at nagkakahalaga ng Php462,400, dalawang pirasong coin purse at Php600 bilang boodle money.
Ang mga suspek ay nahaharap sa kasong paglabag sa Republic Act 9165 o “Comprehensive Dangerous Drugs Act of 2002”.
Ang matagumpay na operasyon kontra ilegal na droga ng Laguna PNP ay mahalaga sa pagtataguyod ng isang ligtas at mapayapang lipunan. Sa patuloy na pagpapatupad ng batas nagkakaroon ng mas matatag na hakbang tungo sa isang bansa na Malaya sa banta ng ilegal na droga at nagbibigay ng mas maliwanag na kinabukasan sa bawat mamamayan.
Source: Laguna Police Provincial Office
Panulat ni Patrolwoman Angelica Rica S Teng
