Malabon City — Tinatayang Php427,380 halaga ng shabu at isang kalibre ng baril ang nakumpiska sa isinagawang buy-bust operation ng Malabon City Police Station nito lamang Linggo, Enero 29, 2023.
Kinilala ni PBGen Ponce Rogelio Peñones Jr, District Director ng Northern Police District, ang mga suspek na sina alyas “Justin”, 39; alyas “Estang”, 41; at alyas “Lucas”, 29, pawang mga residente ng lungsod ng Malabon.
Ayon kay PBGen Peñones Jr, dakong 10:40 ng gabi nang maaresto ang mga suspek sa kahabaan ng P. Aquino Avenue sa tabi ng Our Lady of Lourdes Eternal Park Cemetery, Barangay Tonsuya, Malabon City ng mga operatiba ng Station Drug Enforcement Unit ng Malabon CPS sa pangunguna ni Police Captain Alexander J Dela Cruz, OIC, SDEU kasama ang PDEA NCR.
Narekober sa mga suspek ang apat na piraso ng heat-sealed transparent plastic sachet na naglalaman ng hinihinalang shabu; isang tunay na Php1,000 na ginamit bilang buy-bust money; at isang 1911 colt caliber .45mm pistol na may serial number na 3228195 na may dalawang piraso ng magazine at labing-isang piraso ng caliber .45mm na live ammunition.
Mahaharap ang mga suspek sa mga kasong paglabag sa RA 9165 o Comprehensive Dangerous Drugs Act of 2002 at RA 10591 o Comprehensive Firearms and Ammunition Regulation Act.
Ang PNP ay lalong pagsisikapan na panatilihing ligtas ang bansa mula sa lahat ng uri ng kriminalidad at ilegal na droga.
Source: NPD PIO
Panulat ni PSSg Remelin M Gargantos
