Iloilo City – Dalawang menor de edad ang nahulihan ng mga awtoridad ng ipinagbabawal na droga sa isinagawang drug buy-bust operation sa Brgy. Sta. Cruz, Arevalo, Iloilo City, nitong Hulyo 24, 2023.
Ang isa sa mga nahuli ay 17-anyos na babae, habang ang kasama nito ay 15-anyos na lalaki, parehong mga studyante at pawang mga residente ng nasabing lungsod.
Ayon kay Police Captain Glenn Soliman ng Regional Police Drug Enforcement Unit 6, nakuha sa mga ito ang 5 gramo ng pinaniniwalaang shabu kabilang na ang buy-bust item na nagkakahalaga ng Php40,000, Php12,000 na ginamit bilang buy-bust money, at isang android cellular phone.
Ang dalawang nahuling menor de edad ay nasa pangangalaga na ngayon ng Iloilo City Police Station 6 para sa karampatang disposisyon.
Panawagan naman ng kapulisan sa mga magulang na gabayan ang kanilang mga anak upang maging isang responsableng miyembro ng lipunan, at huwag silang hayaan na maging biktima ng ipinagbabawal na droga na nakakasira ng kinabukasan, lalo na sa ating mga kabataan.
