Tinatayang Php409,360 halaga ng ilegal na droga ang nasamsam sa ikinasang buy-bust operation ng mga operatiba ng Valencia City Drug Enforcement Unit sa Purok 7, Sinalayan, Barangay Lumbo, Valencia City, Bukidnon nito lamang Oktubre 21, 2024.
Kinilala ni Police Lieutenant Colonel Mitchel C Clemencio, Hepe ng Valencia City Police Station, ang drug suspek na si alyas “Tata”, 37 na taong gulang at residente ng nasabing lugar na patuloy na tinutugis ng mga otoridad.
Bandang 6:05 ng umaga ng ikasa ang buy-bust operation ng mga operatiba ng Valencia City Police Station – Drug Enforcement Unit na nagresulta sa pagkakakumpiska ng pitong piraso ng pakete ng hinihinalang shabu na may bigat na nasa 60.2 na gramo na may halagang Php409,360; isang sling bag; cellphone at Php500 bill na ginamit bilang buy-bust money.
Ang Valencia City PNP ay patuloy na nagsasagawa ng mga operasyon kontra ilegal na droga para mas mapanatiling payapa at ligtas ang komunidad.
