Guiguinto, Bulacan – Tinatayang Php408,000 halaga ng shabu ang nakumpiska sa isang suspek sa isinagawang buy-bust operation ng Bulacan PNP sa Barangay Poblacion, Guiguinto, Bulacan nito lamang Martes, Agosto 2, 2022.
Kinilala ni Police Colonel Charlie A Cabradilla, Acting Provincial Director ng Bulacan Police Provincial Office, ang suspek na si Enmark Mirano y Espinosa, 35, residente ng Barangay Lambakin, Marilao, Bulacan.
Ayon kay PCol Cabradilla, bandang 2:00 ng madaling araw nang naaresto ang suspek sa nasabing barangay sa pinagsanib na puwersa ng Provincial Intelligence Unit at Provincial Drug Enforcement Unit ng Bulacan Police Provincial Office at Guiguinto Municipal Police Station.
Dagdag ni PCol Cabradilla, narekober mula sa suspek ang nasa humigit kumulang 60 gramo ng hinihinalang shabu na may tinatayang halaga na Php408,000 at isang Php1,000 na marked money.
Nahaharap ang mga suspek sa kasong paglabag sa Section 5, 11 ng Article II Republic Act 9165 o Comprehensive Dangerous Drugs Act of 2002 at RA 10591 o Comprehensive Firearms and Ammunition Regulation Act.
Patuloy pa rin ang ginagawang operasyon ng PNP para tuluyang mahuli ang mga nagbebenta at gumagamit ng ilegal na droga at maging malaya ang bansa sa ipinagbabawal na gamot na sumisira sa kinabukasan ng ating mamamayan lalo na ang kabataan.
Source: Bulacan PPO
###
Panulat ni PCpl Jeselle V Rivera
