Nakumpiska ang tinatayang Php401,000 halaga ng shabu sa mga drug suspek sa ikinasang joint buy-bust operation ng mga operatiba ng City Drug Enforcement Unit at Valencia City Police Station nito lamang ika-29 ng Disyembre 2024 sa Purok 2, Barangay Pinatilan,Valencia City, Bukidnon.
Kinilala ni Police Brigadier General Jaysen C De Guzman, Regional Director ng Police Regional Office 10, ang mga suspek na sina alyas “Win-win”, 18 taong gulang, walang trabaho at residente ng Purok 3, Colonia,Valencia City, Bukidnon at katuwang nito ang 16 na taong gulang na estudyanteng lalake na naninirahan sa nasabing lungsod.
Sa nasabing operasyon ng mga operatiba ng City Drug Enforcement Unit at Valencia City Police Station ay nagresulta sa matagumpay na pagkakadakip sa mga suspek at pagkakakumpiska ng anim na piraso ng pakete na hinihinalang shabu na may timbang na nasa 59.1 gramo na may Standard Drug Price na Php401,880; dalawang black foot socks na nagsisilbing lalagyan ng shabu, dalawang tin cans, isang unit na android phone, dalawang motorsiklo at Php500 bill na ginamit bilang buy-bust money.
Ang menor-de-edad ay itinurn-over sa City Social Welfare and Development Office para sa nararapat na disposisyon.
Kasong paglabag sa Section 5 at 11, Article II ng Republic Act 9165 o “Comprehensive Dangerous Drugs Act of 2002” ang kakaharapin ng suspek.
“Patuloy po ang inyong kapulisan sa rehiyon diyes sa kampanya kontra ilegal na droga. Hinihikayat ko po ang publiko na magmasid sa paligid at ireport ang anumang ilegal na aktibidad na makikita sa inyong lugar”, ani RD De Guzman.
